Ceyhun Bayramov BMT Baş Assambleyasının 79-cu sessiyası çərçivəsində “Gələcəyin Sammiti”ndə çıxış edib

23 sentyabr 2024-cü ildə Azərbaycan Respublikasının xarici işlər naziri Ceyhun Bayramov, BMT Baş Assambleyasının 79-cu sessiyası çərçivəsində təşkil olunan “Gələcəyin Sammiti”ndə iştirak edib və çıxış edib. Bu barədə Azərbaycan Xarici İşlər Nazirliyi məlumat yayıb.

Çıxış zamanı nazir ölkəmizin beynəlxalq sülh və təhlükəsizliyin qorunması, dayanıqlı inkişafın təmin edilməsi və iqlim dəyişikliyi ilə mübarizədə göstərdiyi səylər haqqında danışıb. Eyni zamanda, qlobal çağırışlarla mübarizədə çoxtərəfli əməkdaşlığın vacibliyi vurğulanıb.

Nazir, Azərbaycan hökumətinin Dayanıqlı İnkişaf Məqsədləri (DİM) istiqamətində mövcud beynəlxalq öhdəlikləri yerinə yetirməyə davam etdiyini bildirib. O qeyd edib ki, ölkəmiz 17 məqsəd, 88 hədəf və 119 göstərici əsasında dayanıqlı inkişaf gündəliyini irəlilətməyə davam edir. Eyni zamanda, 2030-cu ilədək dörd Könüllü Milli Hesabat təqdim edilib və 2024-cü il üzrə Dayanıqlı İnkişaf Hesabatına əsasən Azərbaycan bu sahədə qabaqcıl ölkələr sırasındadır.

Nazir Bayramov ərazilərimizin işğaldan azad olunması ilə dayanıqlı inkişaf üçün yeni imkanların açıldığını və hazırda genişmiqyaslı bərpa işlərinin DİM-lərin icrasına xidmət etdiyini vurğulayıb. Həmçinin, minalardan təmizlənmə işlərinin ölkəmiz üçün böyük prioritet olduğunu qeyd edərək bu istiqamətdə səylərin genişləndirildiyini bildirib.

Bundan əlavə, nazir Azərbaycanın beynəlxalq hüquq normalarına hörmət edilməsini daim müdafiə etdiyini və ikili standartların yolverilməz olduğunu vurğulayıb. Ölkəmizin suverenliyi və ərazi bütövlüyünün bərpa edildiyi, Ermənistanla normallaşma prosesinin başlanması üçün təşəbbüs göstərildiyi diqqətə çatdırılıb.
Noyabr ayında Azərbaycanın BMT-nin İqlim Dəyişmələri üzrə Çərçivə Konvensiyasının Tərəflər Konfransının (COP29) 29-cu sessiyasına ev sahibliyi edəcəyini bildirən nazir, bu tədbirin iqlim dəyişikliyi ilə mübarizə istiqamətində inklüziv əməkdaşlığı təşviq edəcəyini qeyd edib. Azərbaycanın COP29 sədrliyi çərçivəsində maliyyə resurslarının səfərbər olunması və iqlimlə bağlı ambisiyaların gücləndirilməsi diqqət mərkəzində olacaq.

Bununla yanaşı, COP29 sessiyası çərçivəsində Azərbaycan qlobal sülhə töhfə vermək üçün “COP Barışıq Çağırışı” təşəbbüsü ilə çıxış edib. Bu çağırış çərçivəsində barışığın əldə olunmasına yönəlmiş fəaliyyətlərin təşviqi planlaşdırılır.