İstifadəyə yararlı və yararsız çimərliklər məlum olub

“Abşeron yarımadasında və sahilyanı ərazidə yerləşən çimərliklərin monitorinqi aparılıb”.

Bunu Respublika Gigiyena və Epidemiologiya Mərkəzinin şöbə müdiri Ziyəddin Kazımov "Çimərlikdə dəniz suyunun monitorinqi" mövzusunda danışarkən deyib.

O bildirib ki, monitorinqlər Bakı şəhərində yerləşən 7 rayonu əhatə edib: “Eyni zamanda, respublikanın cənub və şimal zonalarında və Sumqayıtda da monitorinqlər həyata keçirilib. Əsasən çimərlik ərazisində dəniz suyunun 3 nöqtəsindən - mərkəzi, sağ və sol - nümunə götürülüb. Bağırsaq çöplərinin miqdarı müəyyən olunur. Bu standartdan yuxarı olarsa, insanlarda xəstələnmə hallarına səbəb ola bilər. Çirklənməyə əsas səbəb məişət-çirkab sularının heç bir təmizləmə aparılmadan dənizə buraxılmasıdır”.

Şöbə müdiri deyib ki, iyunun 10-15-də monitorinqlərin nəticələri barədə daha geniş məlumat veriləcək.

Ziyəddin Kazımov qeyd edib ki, aparılan monitorinqlərin ilkin nəticəsinə görə, Xəzər və Binəqədi rayonları ərazisindəki çimərliklərdən vətəndaşların istifadə etməsi daha məqsədəuyğundur.

O vurğulayıb ki, Qaradağda Sahil, Səbaildə Şıx, eyni zamanda, Hövsan və Türkan çimərliklərindən vətəndaşların istifadə etməsi məqsədəuyğun sayılmır.