Bölmələr
30 avqust – 1 sentyabr 2024-cü il tarixlərində Macarıstanın paytaxtı Budapeştdə keçirilən 14-cü Avropa Şotokan Karate Çempionatında Azərbaycan idmançıları böyük uğurlara imza atıblar. Turnirə Avropanın 22 ölkəsindən 1000-dən çox idmançı qatılıb və yarış yüksək səviyyədə təşkil olunub. Azərbaycanı təmsil edən Fövqəladə Hallar Nazirliyinin (FHN) karate komandası yarışda parlaq nəticələr əldə edib.
Xüsusilə, -75 kq çəki dərəcəsində Nicat Kərimli həm gənclər, həm də böyüklər arasında kumite yarışlarında bütün rəqiblərini məğlub edərək iki qızıl medal qazanıb. +84 kq çəki dərəcəsində isə Nihad Kərimzadə gümüş medala layiq görülüb. Komandanın digər üzvü Yavərbəy Allahverdiyev gənclər arasında +84 kq çəkidə qızıl, böyüklər arasında isə bürünc medal qazanıb. Kənan Süleymanov -76 kq çəki dərəcəsində gənclər arasında gümüş medal qazanıb. FHN-in karate komandası, həmçinin, komanda yarışlarında da uğur qazanaraq qızıl medal və kuboka yiyələnib.
FHN-in Dövlət Yanğından Mühafizə Xidmətinin əməkdaşı, daxili xidmət mayoru İlqar Ələkbərov da turnirdə fərqlənib. O, jiyu-kumite və şobu ippon yarışlarında müvafiq olaraq qızıl və bürünc medallara sahib olub. Turnirin sonunda qaliblərə Dünya Şotokan Karate Federasiyasının (WSF) kubok, medal və sertifikatları təqdim olunub.
Bundan başqa, 23 avqust – 1 sentyabr 2024-cü il tarixlərində Budapeştdə keçirilən Dünya Kikboksinq Federasiyasının (WAKO) təşkil etdiyi Dünya Birinciliyində də FHN-in kikboksinq komandası yüksək nəticələr göstərib. Turnirdə 71 ölkədən 3500-dən çox idmançı iştirak edib. FHN komandasının üzvləri Elnar Hacıyev (45 kq) və Mirfərid Seyidli (60 kq) "low kick" versiyasında bürünc medal qazanıblar. Onları bu uğura İdman-sağlamlıq klubunun məşqçi-müəllimi Elşən İsayev hazırlayıb.
9 sentyabr 2024-cü il tarixində FHN-in İdman-sağlamlıq klubunun rəisi, polkovnik Füzuli Musayev, idmançıları və məşqçiləri qazandıqları nailiyyətlərə görə təbrik edib və gələcək yarışlarda onlara uğurlar arzulayıb.