Azinfo » Xəbər » Sosial xəbərlər » 73 saylı Masallı-Cəlilabad seçki dairəsindən deputatlığa namizəd Fəzail İbrahimli Çaxırlı kənd sakinləri ilə görüş keçirib

73 saylı Masallı-Cəlilabad seçki dairəsindən deputatlığa namizəd Fəzail İbrahimli Çaxırlı kənd sakinləri ilə görüş keçirib

Tarix : 23-08-2024 / Xəbər / Sosial xəbərlər

73 saylı Masallı-Cəlilabad seçki dairəsindən Vətəndaş Həmrəyliyi Partiyasının deputatlığa namizədi, VHP sədrinin birinci müavini və tanınmış ziyalı Fəzail İbrahimli, təşviqat kampaniyası çərçivəsində növbəti görüşünü Çaxırlı kəndində keçirib.

Görüşün əvvəlində torpaqlarımızın işğaldan azad olunması uğrunda gedən döyüşlərdə qəhrəmancasına şəhid olmuş şəhidlərin xatirəsi bir dəqiqəlik sükutla yad edilib.

Fəzail İbrahimli çıxışında, Azərbaycanın beynəlxalq arenada qazandığı xüsusi mövqedən bəhs edərək, bu kontekstdə parlamentin qarşısında duran böyük və məsuliyyətli vəzifələrə diqqət çəkib. O, öz platforması ilə seçiciləri tanış edərək, gələcəkdə görəcəyi işlər barədə geniş məlumat verib. Görüş zamanı seçicilərin problemlərini dinləyən Fəzail İbrahimli, deputat seçildiyi təqdirdə, bu problemləri aidiyyatı qurumların qarşısında qaldıracağını və onların həlli üçün çalışacağını vəd edib.

Görüşdə seçicilər adından çıxış edən ziyalı Ziyafət Məmmədov 1 sentyabr 2024-cü il parlament seçkilərində Fəzail İbrahimliyə səs verəcəklərini bəyan edib.

Ziyafət Məmmədov Fəzail İbrahimlinin ziyalı və alim kimi üstünlüklərini vurğulayaraq, onun millət vəkili kimi hər zaman ədalətli və xalqın mənafeyini qoruyan bir şəxsiyyət olduğunu bildirib. Məhz bu səbəbdən Çaxırlı seçiciləri Fəzail İbrahimlini öz deputatı kimi görmək arzusundadırlar.

Ramiq Mürsəl